O pleno da corporación aprobou por unanimidade destinar os 36.250 euros do programa “Remocicar III” incluído no plan de Modernización de Mercados Locais á mellora da praza de abastos.
Nesta fase III do programa Remocicar inclúense obras de mellora no saneamento e entubado do mercado municipal de abastos. Tamén inclúe outras melloras como instalar unha rede wi-fi, e acondicionamento das zonas de contenedores.
A Concelleira de Industria e Comercio Mónica González Eiras considera que con este investimento vaise solucionar un problema importante no mercado municipal, o que xunto coas melloras nas zonas de contenedores e a wi-fi vai permitir un importante avance para os usuarios da praza de abastos.
En anteriores fases do programa Remocicar, (en execución) aprobouse dotar dun sistema de cubrición por toldos para o mercadiño ambulante de produtos tradicionais, que ira acompañado con bolsas e mandís coa imaxe corporativa do mercadiño. Outra das fases permitirá instalar novo mobiliario no casco histórico.
Este proxecto foi aprobado pola Mesa Local de Comercio, constituída por representantes dos grupos municipais do Concello de Noia, representante da Xunta de Galicia, Asociación de consumidores (representado por Amas de Casa) e a Asociación de comerciantes e profesionais Noia Histórica.
